Galego para nós!
O Galego para nós!, Novo Manual de Língua Galega, é umha proposta para a autoformaçom lingüística num país com a própria língua em situaçom precária por falta de umha política institucional ao serviço da sua comunidade de falantes.
Sem grandes pretensons, aspiramos a fornecer umha ferramenta útil para que qualquer galego, qualquer galega interessada em adquirir competência no padrom reintegrado da nossa língua poda avançar nessa direçom mesmo sem aulas ou ensino regrado e presencial.
Para tal, oferecemos alguns recursos agrupados neste volume, que inclui aspetos de gramática, vocabulário, fonética, ortografia e fraseologia, com a perspetiva ampla da unidade com o resto de variantes, especialmente a lusa e brasileira, da língua comum.
Infelizmente, nom conseguimos incluir conteúdos das variantes angolana, moçambicana e outras, que seriam de grande interesse, mas viriam a tornar complexa de mais a empreitada que assumimos com a elaboraçom deste material de autoaprendizagem.
O volume é dividido basicamente em 10 Temas, um Apêndice, um Solucionário e um Índice Remissivo de termos e conteúdos lingüísticos tratados.
Cada Tema é formado por 5 secçons.
→ A primeira, LER A LÍNGUA LITERÁRIA, incorpora pequenos textos da criaçom literária como convite para a leitura de contos, poemas e teatro, geralmente com algumha vinculaçom temática ao conteúdo do Tema que introduzem.
→ A seguir, NO OBRADOIRO GRAMATICAL disponibilizarmos o conteúdo de carácter ortográfico, fonético, sintático, morfológico… com exemplos para tentar facilitar a aquisiçom de algumha competência através da gramática explícita.
→ Virá logo a secçom PRODUZINDO PALAVRAS, dedicada à aprendizagem de vocabulário e de expressons idiomáticas, provérbios e outros recursos lexicográficos.
→ Depois do conteúdo mais teórico, cada Tema inclui UMHA OLHADA À HISTÓRIA, umha secçom em que incorporamos pequenos textos analíticos sobre episódios da história da Galiza, de Portugal e do Brasil.
A intençom é dupla: transmitir umha vontade de diálogo cultural com outros países de língua oficial portuguesa e incluir um levantamento de construçons, termos e expressons aprendidas no próprio Manual, agora através da leitura de textos formais.
→ Na secçom final, ARREGAÇA AS MANGAS, propomos alguns exercícios para praticar os conteúdos adquiridos em cada Tema, resolvidos num Solucionário na parte final do livro, para facilitar a autonomia do processo formativo.
Ao longo de cada Tema, verás que aparecem ilustraçons de apoio, bem como caixas de texto intituladas FICA DE OLHO! ou SABIAS QUE…? , com informaçons pontuais e complementares de tipo lingüístico e cultural.
Também incorporamos umha série de áudios acessíveis mediante código QR nos temas 1, 3, 4, 9 e 10, para darmos umha dimensom também oral aos materiais que propomos e assi melhorar a competência no nosso galego falado. Acedendo aos links correspondentes, poderás escuitar e imitar aspetos fonéticos e de entoaçom, que julgamos de importáncia para um verdadeiro reencontro com a nossa língua. Os áudios som facilmente acessíveis mesmo a partir de um telemóvel.
Se bem o público-alvo é à partida galego, achamos que qualquer pessoa com formaçom em línguas pode debruçar nestas páginas para conhecer e aprender galego connosco.
Nom queremos deixar de apontar umha evidência: a linha padronizadora que este Manual segue é a do reintegracionismo histórico galego, aquela que afirma a plena incorporaçom do galego ao seu ámbito galego-luso-brasileiro entendido como campo policêntrico. Nele, a Galiza deve contar com um padrom soberano e nacional, solidário com os restantes padrons e em diálogo permanente, preservando e afirmando a riqueza da nossa variante. Esperamos que, com toda a modéstia, a obra que tés na maos poda representar umha experiência produtiva nessa direçom.
Galiza, julho de 2026